தனிமை

Image Source - Google

உன்னிடம் சொல்லவென
அன்றாட அலுவலகத்தின்
அசட்டுத்தன செய்திகள்
அர்த்தமில்லா சிரிப்புகள்
பேருந்து பயணத்தின்
சின்னஞ்சிறு சண்டைகள்
வழியில் பார்த்த பெண்களின்
அழகு ஆடை அணிகலன்
அத்தனையும் நினைவில் சுமந்து

வீட்டுக் குழந்தை விளையாட
பொம்மை வாங்கும் தந்தைகள்
கைகோர்த்துக் கவனமுடன்
நடக்கும் முதிய தம்பதி
கண் நிறைக்கும் களிப்போடு
அமர்ந்திருக்கும் காதலர்கள்
'மனைவிக்கு'  வாங்கச் சொல்லி
விற்க முயலும் பூக்காரி
அனைவரையும் தாண்டி வந்து

வீட்டுக்கதவைத் திறந்ததுமே
முகத்தினிலே அறைவது
வெப்பக் காற்று மட்டுமல்ல
நீ இல்லாத என் வாழ்வின்
வெறிச்சோடிய தனிமையும்
வெதும்ப வைக்கும் வெறுமையுந்தான்!